uMthunywa
Cornelius Luphahla
KWENZAKALE insindabaphenduli yendaba esigabeni seSiziphile eLupane lapho inkomo zomunye umfundisi webandla leZinkonjani Church in Zion eziphenduke zaba zimpala ngemva kokuchelwa ngo-tsikamutanda.
Isiga lesi senzakale kuviki ephelileyo lapho okufike otsikamutanda kulesisigaba benxuswe yizakhamizi bafika bachela inkomo zikaMnumzana Trust Ndlovu ongumfundisi qede zaphenduka impala zabaleka kwasala ihlekana.
Ekhuluma lentatheli ecingweni uNkosazana Zanele Bhebhe uthe kuyisimanga kuye ukuthi umhlambi wenkomo zikamfundisi uNdlovu uphenduke impala.
“Mina otsikamutanda laba bephendula inkomo zikaNdlovu zisiba zimpala ngangikhona njalo kangilankani ngengakubonayo. Sathi sifika esibayeni sikaNdlovu otsikamutanda bangena phakathi bafeza ngamanzi abo ngemva kwalokho batshaya enye inkomo ngoswazi.
“Kusenjalo kwathutsha isavunguzane esikhulu ngabona kuphuma impala esibayeni zingumhlambi kwasala inkomo ezilutshwana esibayeni khonapho isibaya sasigcwele phamu. Izinja ezazilapho zaduma zilandela kodwa kazizange zabamba ngitsho leyodwa,” kulandisa uNkszn Bhebhe.
UMthunywa ukhulumisane loMnumzana Rodger Tshuma omunye wabakhonza kulelibandla elikhokhelwa ngumfundisi uNdlovu oveze ukuthi bona baqala kudala ukumsola umfundisi wabo ngoba inkomo zakhe kaziphili njengezinye inkomo.
“Thina saqala kudala ukumsolela umfundisi ngoba inkomo zakhe ziphila njengenyamazana. Ngitsho ngoba ube uthi ungazithola zisidla emasimini zigijime kakhulu ungeke uzinqande. Isimanga yikuthi ubezidinga ngemota ehamba ngomgwaqo zithi zingezwa imota yakhe iduma zigijime ziqonde ekhaya zonke.
“Ngendlela ezinengi ngayo zingedlula amakhulu amahlanu kodwa zonke ubesenelisa ukuzidinga ngemota yakhe,” kutsho uMnu Tshuma.
Esinye isakhamuzi sakule indawo uMnumzana Benjamin Ncube uthe uyakholwa ukuthi inkomo zikaNdlovu ngezomuthi ngoba zake zagwaza esinye isakhamuzi esatshontsha ezinye zazo.
“Mina ngiyakholwa sibili ukuthi inkomo zikaNdlovu ngezomuthi ngoba kumnyaka ophelileyo kulesinye isakhamuzi esabanjwa sesitshontshe ezinye inkomo zakhe sazithengisa uNdlovu wathi kasibophisi sizazibonela. Isimanga yikuthi isakhamuzi lesi sathi sidinga inkomo eguswini zathutsha inkomo zikaNdlovu zasihlaba zaphosa zasibulala.
“Ngemva kwalokho zalandela inqola eyayisithwele zayahlala eduze lomuzi waso okwamaviki amabili waze wazozithatha uNdlovu sezifuna ukuhlaba wonke umuntu wakulo umuzi. Kwahle kwakhanya ukuthi ngezomuthi ngoba akulankomo engenza isiga esinjalo,” kutsho uMnu Ncube.
Ebuzwa ngale indaba uMnu Ndlovu uveze ukuthi inkomo zakhe zenele kaziphendukanga impala ngakho kayazi indaba enjalo.
“Otsikamutanda bafika emzini wami kodwa inkomo zami zenele ngakho kangazi ukuthi lezo ezaphenduka impala ngezikabani ngoba lami ngabona impala zigijima asazi kumbe zazivela eguswini zisiyanatha,” kuphetha uMnu Ndlovu.
