uMthunywa
YiNtatheli kaMthunywa
ZIBAMBE oluphuphumayo izakhamizi zesigabeni seJongela eNkayi ngemva kokuba inina lendodakazi yalo bebhuqane kwaba luthuli waze wamhlephuna isihlathi ngamazinyo kubangwa indoda.
Lesisiga senzakale ngoMvulo kuyonale iviki lapho uMnumzana Bongani Ndlovu ongumkhwenyana abhacwe khona nguyisezala uThulani Ncube esotha umlilo wemvelo loninazala uSenzelaphi Moyo okuyikho okubangele ukuthi indodakazi yakhe, uCynthia Ncube avukele unina umhlonga aze amhlephune isihlathi.
Kubikwa uMnu Ncube wafika emzini wakhe evela kudla amabele wathola unkosikazi wakhe uMaMoyo enqunu elomkhhwenyana wabo uNdlovu okwakutshengisela ukuba kukhona ababili laba abakade bekwenza okungafanelanga.
UMthunywa uzwe ukuba uNcube akumphathanga kuhle lokhu ngoba uthe enanzelela ukuba umkakhe ubesemacansini lomkhwenyana wathukuthela wafisa lokutshaya umkhwenyana wakhe kodwa kenelisanga ukuba akwenze lokhu ngoba uNdlovu wahle wacela enyaweni.
Kuzwakale ukuba uNcube wathi esehlulekile ukutshaya umkhwenyana wakhe njengokufisa kwakhe, walanda usebele wakhe uyise kaNdlovu, uPhilmon Ndlovu etshabhini ethukuthele egane unwabu esithi umntanakhe usedilize umuzi wakhe.
Kubikwa uMaMoyo nguninomncane womkaNdlovu okuyikho okwenza abe nguninazala.
UMthunywa ukhulume lomunye umfakazi wesiga lesi uNkosazana Nomthandazo Nkomo oveze ukuthi uNkszn Moyo ulande indodakazi yakhe esithi kungani esithi kahlawule imali ayeyiphiwa ngumkakhe okuyikho okubangele ukuthi bacine besilwa okuyikho lapho uNkszn Moyo alunywe khona isihlathi.
Iphephandaba likazulu lenelise ukukhuluma lomkhwenyana uNdlovu othe ebuzwa ngendaba le wahleka andubana acitshe ucingo.
Indaba le icine ingenelwa yizakhamizi zona ezithe kumele ihanjiswe kusobhuku.
