uMthunywa
Delicious Mathuthu
ISABELO seMidlands kubikwa sihambela phambili ngokuba lamacala amanengi amanina adlwengula abesilisa elizweni lonke jikelele.
Inhlolisiso eqhutshwe yinhlanganiso ebona ngezenhlelo zegcikwane le HIV le Aids elizweni eye-National Aids Council (NAC) iveze ukuba kusukela nyakenye isabelo se-Midlands yiso esikhokhelayo ngendaba zokudlwegulwa kwamadoda emacansini ukwedlula ezinye izigaba.
Omkhulu kwezokucubungula inhlelo zalinhlanganiso, uMnunzana Amon Mpofu, uchaze ukuba iNAC ikhathazekile ngokuqhubeka kobudlwangudlangu lobu.
Uthe isabelo se-Midlands sitholakale lamacala amanengi kakhulu amadoda adlwengulwa ngomama emacansini.
“Thina njengenhlanganiso sikhathazekile ngempumela yenhlolisiso esiyenzileyo lapho okuvele ukuthi isabelo seMidlands siyakhokhela endabeni zokudlwengulwa kwabantu abangamadoda ngamanina.
“Sifumane ukuthi manengi amacala aloluhlobo kulesisabelo nxa sesiqathanisa lezinye izabelo zelizwe,” nguMnu Mpofu lo.
UMnu Mpofu wengezelele wathi amacala la kulesisabelo angu-114 phakathi kwangu-1153 abikwa emapholiseni elizweni lonke jikelele.
I-Manicaland iyalandela ngamacala angu-96.
Inhlanganiso ebona ngezabomama eye-Musasa Project edolobheni leGweru njalo ikhangela isigaba seMidlands jikelele, ithe i-Gokwe North leSouth zandile indaba zokudlwengulana emacansini njalo zinengi emthethwandaba.
Nyakenye ilizwe lonke lafumana amacala angu-7900, phakathi kwala amacala angu-637 ayengowokudlwengulwa kwabesilisa.
UMnu Mpofu uthi lokhu kuqansa kwendaba zokudlwengulwa kwabesilisa kuza ngenxa yokuba obaba sebesenelisa ukuqunga izibindi zokuyamangala ukudlwengulwa kwabo kukanti kudala babekhulelwa zinhloni lokwesaba ukukhangelelwa phansi.
Inhlanganiso ebona ngezabobaba, eye-Padare/Enkundleni, ithi yona ayisuthiseki ngenhlelo ezenziwa yilabo abakhankasa ngezokuvikelwa kokudlwengulwa lokuhlukuluzana emacansini njengoba bengaqakathekisi abesilisa kulezindaba, bekhangela omama ikakhulu.
