uMthunywa
Ophezulu Stinta
NGEVIKI edluleyo sitshiye uNgonyama ephakathi kwenkemenkeme yendaba.UBubbles wayesemtshiye phakathi kodaka angaziyo ngitsho lokuthi luxazululwa ngaluphi uhlobo. Simtshiye elobunzima bokuyafika kumkakhe lomthwalo ongumtakaBubbles.UMamsie wayevele esehluleka ukugcina ezakhe izihlobo pho lo owemzini wayezamukela yini? UMamsie ngumuntu ocacayo ukuthi isineke lozwelo kakukho kuye.
Siqala isahluko sesibili. Lapha sithola uMamsie ezicomba comba elungisela ukuya emdlalweni. Simbona engumuntu ozithandayo okwamagama, ngendlela azilungisa ngayo. Siyananzelela njalo ukuthi kwasekusele imizuzu emilutshwane ukuthi umdlalo lo uqalise, wayelungisela ukuya emdlalweni wakoZat. Kucaca wayevele eqophe khona kanye ukungena abantu bonke sebephakathi ukuze amehlo wonke athi nzo phezu kwakhe.Ngowesifazana othanda ukubonakala, angangena abanye sebehlezi phansi akulamuntu owayezambona ukuthi wayegeze kangakanani embethe impahla ezidula okungakanani.
Into esimcunula okwamagama uMamsie yikuthi uNgonyama wayesephuzile ukuzomthatha amhambise kulelodili.
Wayeseze elingisa lokuthi wayezagida njani loJoza, owayeligagu elizwayo kwezokugida. Sinanzelela isimilo sakhe esixegayo lapho esebiza umkakhe ngamagama endelelo ngenxa yokuphuza kwakhe, uze azisole lokwendela kuye, kakhathazeki ukuthi yinindaba ephuzile lokuthi mhlawumbe angabe ephakathi kwengozi yena nje ufuna uNgonyama afike amhambise edilini kuphela.
Walinda esalinda waze wakhupha umhlanga wegwayi walumathisa wabhema.Wayesenengekile okwamagama loba nje yena wayengananzeleli ukuthi iminyaka isihambile kuye lapha,wayelokhu eqakathekisa ezokukholis. Kwaze kwathi ngelikade wayizwa imota yakwakhe isima esangweni lomuzi wabo. Lapho wahle wanyukubalisa ubuso ukuze angangeneki lapho eseyisiziba esingathintwa ngomunwe.
Waqoqoda uNgonyama, wangena lokuyisikhusukhusu okwakuzingcolele kugodola lokugodola ngapha kukhwehlela lokukhwehlela.Wakukhangela ngelihlo locunukileyo uMamsie kazange avume lalapho umkakhe emtshonisa, wabuza ngelokweyisa ukuthi kuyini lokhu ayemphathele khona. Ingane kaBubbles wayengayiboni njengomuntu, kuye kwakuyinto nje. Wayegcwele yikuyenyanya ingane le. Wabuye wamdobha njalo ngelithi wayesemphuzisile yena efuna ukuya zikholisela labakholisayo.
Ubuya amgcone njalo ngelithi kade wacela ukuthi amthengele eyakhe imota ukuze enelise ukuziyela ekuthandeni kwakhe ngesikhathi afuna ngaso hatshi ukutshona elinde uNgonyama.Ulenkani yetshongololo uMamsie, sinanzelela lapho uNgonyama emkhumbuza ngelithi kudala wathi kayebhala umhloliso wokutshayela, lapho aphendula khona ngelithi uzadinga abazamfundisa kungathi bakhona abatshayela bengelazo incwadi zokutshayela nje. Ngumuntu ongavumi kuxwayiswa loba ukwelulekwa.
