uMthunywa
Mthokozisi Dube
INHLANGANISO yeJoshua Nkomo Cultural Movement (JNCM) isibike ukuba asesezingeni eliphezulu amalungiselelo okukhumbula imisebenzi eyenziwa nguFather Zimbabwe, uDokotela Joshua Mqabuko Nyongolo Nkomo ekukhululeni ilizwe lethu.
Umkhosi lo uzakwenziwa mhlaka 1 Ntulikazi eStanley Square eMakokoba koBulawayo.
Kubikwa umkhosi lo uzaqala ngohambo olubizwa ngokuthi yi-General Josh Legacy walk — oluzasuka emahofisini eJNCM eBlue Lagoon lusiya kusithombe sikaNkomo kuJoshua Mqabuko Street andubana babhekise amabombo eStanley Square.
UMnumzana Mehluli Moyo onguMqondisi wamalungiselelo omkhosi lo uthe umhlaka 1 Ntulikazi walonyaka uzabe wehlukene leminye ngoba banxuse bonke abantu ukuthi baphatheke kiwo.
“Lonyaka wonke umuntu uzaphatheka kumkhosi wokukhumbula imisebenzi kaMdala wethu njalo wonke umuntu ukhululekile ukusixhasa kundingeko zonke ezikhona,” kutsho uMnu Moyo.
UMnu Moyo ugcizelele ukuthi uMdala wethu wahlanganisa abantu kungakho yikho labo njengenhlanganiso abafuna ukuqhubeka bekufafaza emphakathini.
Umkhosi wokukhumbula uMdala wethu lonyaka uzaqhutshwa ngaphansi kwendikimba ethi “Peace, unity and Tolerance,” okutsho ukuthi ukuthula, ukubambana kanye lokwenelisa ukwamukelana njengabantu lanxa sehlukene.
UMnu Moyo uqhubekele phambili esithi kumkhosi lo bafuna ukufundisa abatsha ngemisebenzi kaJoshua Nkomo kuthi abadala bakhumbuze ngemisebenzi yakhe.
“Sivumelane ukuthi sitshengise uzulu wakuleli ngemisebenzi eyenziwa ngubaba uNkomo ekwakheni iZimbabwe ekhululekileyo njalo elengqubekela phambili,” kuchaza uMnu Moyo.
Umuyi uDkt Joshua Nkomo wedlula emhlabeni mhlaka 1 Ntulikazi ngo1999.
