Uncategorized

Bhe ondofa esikolo seSibangani

24 Jun, 2016 - 00:06 0 Views
Bhe ondofa esikolo seSibangani

uMthunywa

Cornelius Luphahla
BAPHAKATHI kwetshe lembokodo ababalisi beSibangani Primary School eLupane ngenxa yabondofa okubikwa sebehluphile ngokulala labesifazana ebusuku kanye lokubathathela ukudla kwabo.

Ondofa laba kubikwa baqale ukukhathaza kulesisikolo izikolo zivulwa ngoNkwenkwezi lapho abebehlasela khona ababalisikazi kuphela noma nje khathesi sebehlasela kanye labesilisa.

Kuzwakale ukuthi ondofa laba bangenela ababalisikazi belele balale labo bebatshiye bengasagqokanga izikhindi bebuye njalo bedle ukudla okulele kuphekiwe bentshontshe lokungaphekwanga behambe lakho.

UMthunywa ukhulumisane lomunye wababalisikazi laba ongathandanga ukubethwa ngegama wachaza ukuthi okwenza bethi ngondofa yikuthi kababoni lutho bezwa kungena umuntu bahle bajumeke.

“Okwenza sithi singenelwa ngondofa yikuthi kakho okubonayo kodwa uzwa kungena umuntu endlini uhle ujumeke ulale uthi uphaphama.

“Ekulaleni lapha uphupha ulele lowesilisa uthi uphaphama uzithole ungasagqokanga isikhindi njalo suzizwa ukuthi ubulele lowesilisa.

“Isimanga yikuthi uphaphama umnyango uvulekile okuchaza ukuthi kuyabe kungene umuntu kodwa kawuboni nyawo lomuntu emnyango kumbe phandle,” kutsho umbalisikazi lo.

Kuzwakale ukuthi emavikini amabili adluleyo abanye ababalisikazi ababili bake bacabanga ukubaleka kulesisikolo baze bancengwa yizakhamizi zakule indawo.

Usobhuku wakule indawo uMnumzana Busani Moyo ebuzwa ngale indaba uveze ukuthi seyizwile njalo isibikelwe induna.

“Kuliqiniso sibili ukuthi kulabondofa asebekhathaza ababalisi esikolo ngokulala labo.

“Ngakho sike senza umhlangano sikhuluma ngendaba le saze sayayibikela induna uMabhikwa ukuthi isivumele sidinge abantu bokukhipha ondofa laba.

“Sibuye njalo sabikela abezemfundo ngakho yibo esesibalindele ukuthi bayebikela njalo induna ukuze sidinga abangakhipha ondofa laba ngoba singabalekelwa ngababalisi njengoba bevele bebalutshwana,” kutsho uMnu Moyo.

Induna uVusumuzi Mabhikwa Khumalo uchaze ukuthi seyizwile njalo seqalile ukuzama amacebo lezakhamizi ukuze bakhiphe ondofa laba.

“Indaba yabondofa asebehluphile esikolo seSibangani sengiyizwile ngakho ngisabonisana lezakhamizi ukuze kukhitshwe ondofa laba.

“Ekukhitshweni kwabo ngikhangelele ukuthi zonke izakhamizi zibekhona njalo zisuthiseke kungakhathalekile ukuthi ngamakholwa kumbe ngabomdabu,” kutsho induna uMabhikwa.

UMqondisi wezemfundo esabelweni seMatabeleland North uNkosikazi Boitatelo Mnguni ebuzwa ngale indaba uveze ukuthi ubengakayizwa.

“Indaba yokuthi kulabondofa asebehluphile eSibangani Primary School besingakayizwa ngakho sizayidingisisa ukuze sikhulumisane lezakhamizi ziyilungisise,” kuphetha uNkkz Mnguni.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds