uMthunywa
Cornelius Luphahla
ITHITHIBELE imuli yakoNdlovu esigabeni seDlawa eNkayi ngemva kokuba elinye ilunga layo lilunywe ngubabhemi kamakhelwane qede lahlanya.
Isiga lesi senzakale kuviki ephelileyo lapho uGift Ndlovu alunywe khona ngubabhemi kaMnumzana Thabani Nkomo ntambama evela khelela uMagwebu andubana avuke ekuseni engasaphilanga kuhle engqondweni.
Kuzwakale ukuthi uMnu Ndlovu walunywa ngubabhemi lo sezafika emzini wakhe waselanyulelwa ngomakhelwane bakhe ubabhemi lo esemwisele phansi.
UMthunywa uxhumane loMnumzana Editor Tshuma oyisakhamuzi sakule indawo waveza ukuthi nguye owanceda uNdlovu esekhulelwa ngubabhemi lo.
“Ngaqala ngezwa ubabhemi ekhonya ngemva kwemizuzwana uNdlovu wasehlaba umkhosi ngathi nyawo ngibeletha ngiqonda lapho okwakuvelela khona ilizwi. Ngithe ngithutsha ngambona sewele phansi ubabhemi emluma emhlane.
“Kwaba yinhlanhla ngoba ngangithwele ugodo njalo kwasokulabanye omakhelwane labo bezohlola umkhosi lo sancedisana ukutshaya ubabhemi lo kwaba yikusila kukaNdlovu,” kulandisa uMnu Tshuma.
Kubikwa ngemva kokulunywa kukaNdlovu, uMnu Nkomo wahle wambulala wamtshisa ngoba eseyingozi.
Ekhuluma lentatheli ecingweni uMnumzana Editor Ndlovu umnewabo kaMnu Ndlovu uchaze ukuthi ngemva kokulunywa kwakhe ngubabhemi wavuka engasaphilanga kuhle engqondweni.
“Angilankani ngobabhemi lo owaluma umfowethu ukuthi ngubabhemi bani.
Into engimangalisayo yikuthi wathi elunywe njengayizolo ntambama ekuseni wavuka sehlanya ethi ubona ubabhemi kaNkomo omlumileyo.
“Lokhu kusuka kusolise ukuthi pho ngubabhemi owamlumayo kumbe yizinto zabantu,” kuchaza uMnu Ndlovu.
UNkosazana Lydia Moyo oyisihlobo sikaNdlovu uchaze ukuthi bamthwalela esibhedlela seSt Lukes lapho alaliswe khona.
“Sathi sibona ukuthi uNdlovu sehlanya samusa esibhedlela seSt Lukes ukuyakwelatshwa kodwa kakasili.
Ngikhuluma nje yimi ebengimlindile noma nje ngisuke izolo ngatshiya abanye bemlindile,” kutsho uNkszn Moyo.
UDokotela wezinyamazana uNdabezinhle Mkhwanazi ebuzwa ngesenzo sikababhemi lo uchaze ukuthi kuyenzakala ukuthi ubabhemi alume abantu nxa selobhova.
“Kuyenzakala ukuthi ubabhemi engabalobhova alume abantu ngakho kuyabe kufanele kuhlolwe ikhanda lakhe ngemva kokubulawa ukuthi ngabe elobhova yini.
“Ngithemba usakhumbula njalo ngobabhemi weMatobo owaluma imbuzi wayibulala wayidla ngenxa yobhova.
“Ngakho-ke kufanele ukuthi ubabhemi lo ubelobhova,” kuphetha Dkt Mkhwananzi.
