uMthunywa
Buhlebenkosi Gaule
ABENHLANGANISO yeAgritex sebexwayise abalimi ukuba bananzelele isivuno sabo ukuze bangalahlekelwa yinzuzo yabo ngoba lonyaka isivuno siphansi njalo lababona ngomumo womkhathise sebeveze ukuthi kuzakuna izulu ngobusika lobu.
UProvincial Agronomist wesabelweni seMatabeleland North, uMnumzana Davison Masendeke uchaze ukuba abalimi kumele banazelele indlela abagcina ngayo isivuno sabo ukuze singonakali.
“Abalimi abangakavuni izilimo zabo kumele benze ngokuphangisa bavune lokhu kuzabaphathisa ukuthi isivuno esincane singabuyi sihlaselwe yizibungu kumbe yimikhuhlane izilimo zilokhe zisemasimini,” kutsho uMnu Masendeke.
Uqhubekele phambili esithi ababona ngomumo womkhathi abeMeteorological Services sebeveze ukuthi kuzaba lezulu kulobubusika kungakho isivuno sabo silakho ukubola nxa singagcinwanga kuhle.
“Njengoba sekuphume imbiko yokuthi izulu lizakuna ngobusika kumele abalimi babone ukuba iziphala zabo zilungiswe kuhle ukuze kungangeni amanzi azabolisa isivuno zabo.
“Okunye abalimi abangakwenza yikuba bathole imithi engabanceda ukuvikela isivuno sabo kuzibungu ezifana lempehlane eziphehla umumbu lezinye izibungu ezingadla isivuno somlimi ngesikhauhi egcine isivuno esiphaleni.
“Abalimi njalo bakhangelelwe ukuba iziphala zabo zibeyiziphala ezingasoze zivumele ukuba amagundwane angene ngoba lawo alakho ukuphambanisa isivuno somlimi kungakho kumele athiywe phandle kwesiphala,” kuchaza uMnu Masendeke.
UMnumzana Judia Ncube uMatabeleland South Agritex Officer uphinde waxwayisa abalimi ngokuqakatheka kokuthwala ngonanzelelo isivuno sabo ngoba bandise ukulahlekelwa yisivuno sabo.
