uMthunywa
Okhokho babethi bangadla bake bagezise imilomo bathi bafuna basale benambitha okumnandi emilonyeni yabo.
Babekwenza lokhu ngokunatha ihiqa, inkovu, amahewu kumbe umhluzi.
Bakithi sezadlula lezo nsuku, thina lamuhla sikwelinye ibanga kumbe ngithi isikhathi njalo silazo zonke lezi izinto ezazinathwa ngokhokho kodwa silazo izincamuncamu ezincinda imilomo ezitshiya imilomo imnandi ama-dessert lama-pudding.
Bakwethu kumnandi lokhu kudla kuthatha inhliziyo. Kuhle ngoba ungaziphekela udle lemuli yakho kodwa akusuthwa, uyadla lawe lokhu oyabe ukuphiwe.
Kuqakathekile ukuba wazi ukunanzelela ama-dessert la. Lamuhla ngizakhuluma ngokwenza i-dessert kumbe i-pudding okuthiwa yi-tipsy trifle. Maye imnandi sibisibili, ungancitsha isiphofu kodwa ilula ukuyenza njalo idliwa emadilini wonke nje. Zenzele-ke.
OKUDINGAKALAYO
1. Ikhekhe okuthiwa yi-sponge cake elilensukwana lenziwe
2. Yenza iziqa ze-sponge cake
3. Ingxenye yenkomitsho yetiye ijemu ebomvu.
4. Ingxenye yenkomitsho yetiye yamasheri okuphekisa (cooking cherries)
5. Inkomitsho ezimbili ze-custard ephekwe yaphola
6. Inkomitsho yetiye ulaza (cream)
7. Ingxenye yenkomitsho ama-peaches ephuma egabheni hatshi umhluzi wawo
8. Ukhezo lwetiye, umhluzi we-almond lowe-cherry
9. Ijeli (jelly) ebomvu kumbe eluhlaza ephuma kufiriji
10. Umganu oyingubhe wegilasi
UKULUNGISA I-DESSERT YE-TRIFLE
1. Qoba ikhekhe iziqana.
2. Hlanganisa iziqa zekhekhe ngambili ngokufaka ijemu phakathi.
3. Faka emganwini wegilasi.
4. Thela phezulu kweziqa i-cherry eyingxenye yenkomitsho.
5. Thela phezu ingxenye yenkomitsho ikhasitadi eqandayo ingene phakathi kweziqa zekhekhe.
6. Yekela kuhlale efrijini kuze kuqande mo.
7. Nxa sekuqanda qoba iziqana.
8. Faka lezi ziqana ze-jelly phezulu emganwini.
9. Thela enye ikhasitadi eqandayo phezulu.
10. Khathesi tshaya ulaza nge-beater ulufake itshukela.
11. Lutshaye ulaza luze lujiyajiye.
12. Thela ulaza phezulu emganwini egilasi
13. Bona ukuthi luthe yacalala kumganu wonke.
14. Bona njalo ukuthi akukho okuvelayo phakathi kolaza.
15. Khathesi qumaquma ama-cherry.
16. Qumaquma i-jelly ibe yiziqana
17. Cecisa ngokubeka lezi iziqana phezu kolaza.
*NB: Umganu wegilasi uhamba ulamabalabala emihlobo yonke oyisebenzisileyo, kuhle lokhu.
UKUDLIWA
Le i-dessert idliwa ngemuva kokudla kwemini kumbe ntambana, zikholisele manje.
