uMthunywa
Pumulani Mpofu
Intandane enhle bathi ngekhothwa ngunina, kusuke kube lusizi nxa umama kube nguye oqale ukubhubha ngoba okusala kusenzeka kuyehlukana. Abanye obaba bayananzela ukuthi umntwana usala ephila njani, abanye bayaba lalo uthando lomzali, abakwaziyo ukunakekela abantwana babo. Ngokufanayo bakhona omama abathi loba bephila abantwana umntwana kube sengathi kalamzali.
Kuleliviki ngike ngahlangana lodade othi watshiywa ngumama engela ncwadi yokuzalwa. Ekubhubheni kukamama wasala lobaba kodwa into azisazange zafana, kwaba lenguquko enkulu empilweni yakhe.
UThabiso Nkomo yintombazana eleminyaka engamatshumi amabili engazange yathola ithuba lokuloba iqede isikolo ngoba ingelancwadi yokuzalwa. Umama kaThabiso wabhubha uThabiso eleminyaka elitshumi lantathu wasala ehlala lobaba onguye okwathi sekudlule iminyaka emibili waqala ukumlahlela iganga ethi yena ngeke enelise ukumgcina.
Impilo yabanzima kuThabiso waqala ukubhoda ezihlobeni edinga lapho angahlala khona, umalume wakhe waze wamzwela wahlala laye. Njengoba wayengelayo incwadi yokuzalwa kasazange abuyele esikolo ngoba umthetho ungavumi. Wazama ukuba akhulumisane loyise ukuthi amncedise ukuthatha incwadi yokuzalwa uyise wabamba la wathi yena akakwanisi.
Waqala ukumtshela amagama abuhlungu uyise ethi yena uvele akasiyise ngakho engamkhathazi ethi akamcedise ukulungisa amaphepha akhe ngoba yena engangeni ndawo empilweni kaThabiso.
Impilo yahlaba kuThabiso ngoba kungekho angakwenza engelamaphepha aneleyo, akukho sikolo angasingena njalo akukho msebenzi angawenza.
Ngokunanzelela ukuthi isikhathi sasihamba njalo lezikhathi ziya ziguquka wasesiyadinga uncedo eChildline lapho alayelwa khona eTrinity Project lapho okulenhlanganiso ekhangela ngamalungelo abantwana langokusiza abantu ukuthi bathole incwadi zokuzalwa ngokusemthethweni welizwe.
Ekufikeni kwakhe eTrinity Project wethula udaba lwakhe lokuthi unina kazange athathelwe incwadi yokufa kodwa ayelakho yi-burial order.
Ngokunjalo waziswa ukuthi ukuba yena athole incwadi yokuzalwa kumele aqale ngokuthatha incwadi kanina eyokufa okuyiyo ezamsiza. Ukuze athole lincwadi yokufa kwakumele asizwe ngomalume bakhe okuyibo okufanele bayeyithatha njengezihlobo zikamufi.
Omalume bakhanya bengabantu abafuna ukusiza umzukulu wabo ngakho basuka bathi bazakuyathatha incwadi yokufa ekadadewabo umkakhe lo engekho njengoba babengatshadanga ngokusemthethweni.Basuka omalume bethi sebesiyathatha incwadi yokufa, ngemva kokuthatha lincwadi sebengenelisa ukuba bathathele uThabiso incwadi yokuzalwa.
Kuqakathekile ukuba umntwana athathiswe incwadi yokuzalwa esasemcane ngoba akukho owaziyo ukuthi ikusasa izalani njalo ngubani ozabe ekhona.
Asihlanganeni mgeviki elizayo.
Umlobi utholakala kukheli ethi [email protected],www.trinity project.biz loba kunombolo zocingo ezithi 0773195055.
