uMthunywa
Msilisi Dube
KULENDODA ehlala elokitshini leMagwegwe koBulawayo ebhaxabulwe ngumkayo ngaphambi kokumtshontshela amaphenti ifuna ukuyanika itshamali yayo elipholisa, uMthunywa ukuzwile lokhu.UShelter Magorongoye okungasatholakalanga iminyaka yakhe yokuzalwa utshaye umkakhe, uNjabulo Mloyi ngemva kokuba emfice etshontsha impahla zakhe zangaphansi lezi.
Umtshutshisi wecala leli, uMnumzana Mufaro Mageza ubikele inkundla yeWestern Commonage ngeviki edluleyo ukuba umamangala ubeselomkhuba wokutshontshela umsolwa izigqoko zakhe zangaphansi ayezinika itshamali yakhe.
Kubikwa phakathi kwenyanga kaNhlolanja umsolwa wacatshelwa ngamaphenti akhe amathathu ngakho wasebuza umamangala kodwa wathi kazi lutho ngawo.
Umsolwa wathenga amanye amaphenti wawafihla endlini yabo yokulala. Njengoba kuthiwa inja ingaqhoba ithambo iyejwayela umamangala wazama ukuthatha amaphenti la engazi ukuba wayesezokhele amalahle ekhanda.
Khonokho esathatha amaphenti lawo kubikwa umsolwa wangena endlini waqala ukuxabana lomamangala wambuza ukuba wayewasangaphi. Kubikwa umsolwa watshaya umamangala ngembodlela ebusweni emethesa icala lobufebe okuyinto eyabangela ukuba umamangala ayebika udaba emapholiseni.
Kubuye kwezwakala ukuba ngemva kwensuku ezimbalwa umamangala wathatha ezinye impahla wayazinika itshamali yakhe.
Ebuzwa ngumantshi uMnumzana Mafios Moyo umsolwa ulivumile icala lakhe lokutshaya umamangala wathi wamtshaya ngoba emqambela amanga.
Ngemva kokuzwa ubufakazi lobu umantshi uxolele umsolwa ngoba ethi watshaya umamangala ngoba ethukuthele.
