uMthunywa
Mthokozisi Dube
UMINISTER of State for Provincial Affairs koBulawayo uKhomuredi Eunice Nomthandazo Moyo usebike ukuba ukufikisa kwelizwe iminyaka engu-35 asinto elula kungakho ingqobe isisalele izizalwane zakuleli ukuba zilondoloze uzibuse lo ngeqiniso.Ekhuluma emkhosini wokuthakazelela iminyaka engu-35 obusenkundleni yeWhite City ngoMgqibelo, uKhmrd Moyo ubike ukuba umkhosi walonyaka uza ngesikhathi kuphele isikhathi eside kulwiselwa ukuthi uzibuse angasiphunyuki .
“Impi yenkululeko yasifundisa ukuba okuligugu akubuyi lula kungakho kumele sikulondoloze ngeqiniso,” kubika uKhmrd Moyo.
UKhmrd Moyo ubikele abantu akade bethe gwaqa enkundleni le ukuthi ngesikhathi sempi yenkululeko balahlekelwa yizihlobo labangane kodwa akuzange kubenze bakhohlwe kumbe bakhalale, bala bezimisele yikho nje sizitshaya izifuba ngozibuse kuleli.
Esethula umbiko ovela kuMongameli welizwe, uKhmrd Moyo ubike ukuba bathanda ukubonga abangane babo abafana leChina leRussia bona abangazange batshintshe ubudlelwano babo lelakuleli noma nje amazwe aphetsheya ebelwisela ukuthi elakuleli lihlamukelwe yiwo wonke amazwe.
“Umkhosi walonyaka uza ngesikhathi ilizwe ligcwalisisa iZim Asset ukuze kuvuselelwe ezomnotho njalo kuvuleke imisebenzi,” kuveza uKhmrd Moyo.
UKhmrd Moyo ubike njalo ukuba kuyinhloso kaHulumende ukuthi uzulu atholiswe amathuba alinganayo kwezomnotho kungakho kube lenani eliphezulu lamabhizimisi kuleminyakeni edluleyo.
“UHulumende okwamanje wenza imizamo yokuthi uzulu atholiswe ukudla kulandela ukungani kuhle kwezulu.
Kungakho akulamuntu wakuleli ozabulawa yindlala,” kubika uKhmrd Moyo.
UKhmrd Moyo uthethe ithuba lokubonga isenzo seWorld Bank yona eyafaka imali engange $6 miliyoni ukuze kuvuselelwe ingatsha zikaHulumende.
“Umkhosi walonyaka uza njalo ngesikhathi elakuleli lithole isicoco sokuba ngelinye lamazwe amele evakatshelwe yinhlanganiso yeEuropean Tourism Council,” kuchaza uKhmrd Moyo kulandela ukwenelisa ukuphatha kwalo umhlangano weUnited World Tourism lelizwe leZambia.
Wengezelele wathi minengi imisebenzi eqhutshwa nguHulumende ukuze kuthuthukiswe impilo zabantu bakuleli njengoba uHulumende esenelise ukufaka imitshina emitsha ezibhedlela ezinkulu osekusenza ukuhlinzwa kwabantu kubelula kuleli.
“UHulumende sewafaka imitshina emikhulu edingwa ngabantu abagulayo osekusilela nje kuphela ngabantu abafundele imisebenzi yokuhlinza kodwa ngokuya kwesikhathi uHulumende uzalwisela ukuthi abanye baqeqetshiswe kulolohlangothi,” kuchaza uKhmrd Moyo.
Wengezelele wathi ukuphiwa kukaMongameli welizwe isihlalo seSADC kanye lese African Union kutshengisa ukuthi uMongameli welizwe, uKhmrd Robert Mugabe ulwela iqiniso lokuphakanyiswa kwabantu abansundu.
UKhmrd Moyo uphethe ngokutshayela amabutho akuleli ihlombe kulandela ukwenelisa kwawo ukugcina ukuthula emazweni afana leLesotho langesikhathi ilizwe liqhuba imidlalo yama-Youth Games.
