uMthunywa
Cornelius Luphahla
KUBE yisisanasana ubukhwa bezinja esigabeni seTshefunye, eTsholotsho ngemva kokuba amanye amanina ebhuqane kwabancane indawo ebanga umkhwenyana osehlanyiswa ngenye intombi.
Indaba le yenzakale ngoLwesihlanu kuviki ephelileyo lapho uNkosazana Phephelaphi Mpala loNkosazana Simeleni Moyo abadindane kwaze kwahela kozeleyo bebanga ukuba umkhwenyana kaMaMpala uMelusi Ndebele othethe uNkazimulo Tshuma usehlanyisana lomntaka MaMoyo uLisca Nxumalo.
Intatheli ixhumane loMnumzana Shadreck Mthupha olipholisa lakulesisigaba wachaza ukuthi yena wathola amanina la esephakathi kokubhuqana wezwa ngabanye ukuthi babanga umkhwenyana.
“Mina ngangisiyathelela esivandeni sami ngathola kungasibantu ezivandeni bebukele amanina la esilwa.
Kusenjalo uMaMoyo wayesekhumuke amazinyo aphambili kuthi uMaMpala laye wayesevuza igazi engalweni ngenxa yokulunywa ngamazinyo. Ngafika ngathi kabalanyulwe kwayikhona sincedisana ukubalamula.
“Ngathi ngibuza ukuthi babangani bathi babanga ukuba umntakaMaMoyo usethathele umntakaMaMpala indoda.
Ngemva kwalokho ngabahambisa kosobhuku ngoba babelokhe befuna ukulwa,” kutsho uMnu Mthupha.
Ebuzwa ngale indaba uNkosazana Mpala uchaze ukuthi okwenza watshaya uMaMoyo yikuthi uhlala ekhuluma kubi ngomntanakhe nxa embona.
“Okwenza ngamtshaya uMaMoyo yikuthi nsukuzonke nxa engibona ngisiyathelela lomntanami uyasihleka umuzwe sesithi owakhe umntwana uyakwazi ukuphatha indoda yikho ethathela abanye amadoda. Yikho nje ngize ngamkhuza ngathi engabuki umntwana esenza into embi kangaka esigabeni yena wangithethisa wathi kangigezi lomntanami yikho umntanami ebalekelwa yindoda.
“Lami ke ngazonda ngathi engangithethisi wahle wathi usengitshaya lami ngambisela sahle saqala ukulwa ngamtshaya wangiluma. Okungizwisa ubuhlungu yikuthi umntanami ngumuntu ongathandi ukukhuluma ngakho uLisca angaze akhulume njani lonina yena uyazithulela manje sebefuna ukungenza njengaye lami,” kulandisa uNkzn Mpala.
UNkzn Moyo ubikele intatheli ukuthi kakwazi ukuthi uMaMpala wayembangisani wambona esemsukela kuphela.
“Mina kangikwazi ukuthi uMaMpala ungibangisani lomntanami ngoba sathi silokhu sithelela esivandeni ngamuzwa ethi ngiyimbulu ufuna ukungitshaya. Ngathi ngimbuza ukuthi ngenzeni wahle wangisukela wangitshaya lami ngambisela. Lokhu okokuthi umntanami uthandana lomkhwenyana wakhe mina kangikungeni,” kuveza uNkzn Moyo.
UMnu Ndebele ebuzwa ngale indaba uveze ukuthi indaba le sebeyilungisile njengomdeni.
“Kuliqiniso ukuthi sike saxabana lomkami umamazala waze walwa lesinye isakhamuzi kodwa okwakathesi sesiyilungisile indaba le sengizihlalela emzini wami lomkami. Okunengi ngeke ngikukhulume ngoba yimfihlo yomuzi wami,” kuphetha uMnu Ndebele.
