uMthunywa
Buhlebenkosi Gaule
ABENHLANGANISO ye Agriculture Rural Development Authority (ARDA) bathole isikhuthazo esikhulu esivela kuMsekeli kaMongameli welizwe uKhomuredi Emmerson Mnangagwa sokuba indawo yeSilobela ingaba yindawo enhle ukuqalisa ibhizimusi yokufuya inkomo zochago.
UMnumzana Basil Nyabadza ongumgcinisihlalo weARDA uthe uMsekeli kamongameli uKmrd Mnangagwa nguye owaletha umbono wokuthi iSilobela yindawo engagcina inkomo zochago njalo abantu abahlala eSilobela balakho ukuziphilisa ngaleyo bhizimusi.
“Umsekeli kaMongameli welizwe wasivakatshela wasitshiya lombono wokuthi indawo yesilobela ingabayindawo enhle yokugcina inkomo zochago.
“Thina njenge nhlanganiso yeARDA sahle salithathela phezulu lelicebo ngoba kulicebo esilibona lizathuthukisa abantu abanengi beSilobela,” kutsho uMnu Nyabadza.
Inhlanganiso ye ARDA ithe ikhangelele ukuqala loluhlelo ngenyanga ka Ncwabakazi ngemva kokuba abalimi sebevune izilimo zabo ezilinywa ngesikhathi somqando lokhu kuyikho okuzayenza ukuba inkomo zithole kulokudla.
“Sikhangelele ukuba uhlelo lokufuya inkomo zochago silusungule ngenyanga kaNcwabakazi lonyaka.
“Lokhu kuzanceda izakhamizi zeSilobela kakhulu njalo inkomo zakhona zizafica ukudla okufana lamahlanga ngenxa yokuthi abalimi bayabe sebevunile,” kutsho uMnu Nyabadza.
“Uhlelo lokufuya inkomo eSilobela lukhangelelwe ukuthi luzathola indawo eFair Acres Estate ingxenye yaleyo ndawo ingaphansi kwendawo okulinywa khona isoya beans,” ngumnu Nyabadza lo.
UMnu Nyabadza uphethe ngokuthi ibhizimusi yokufuya inkomo zochago izaqala ngenkomo ezingu-30 kodwa lokhu kuzadinga ukulungiselwa imali ezifunekayo ibudget ukuze kwazakale ukuba kufuneka malini ukuze leyo bhizimusi isungulwe.
