uMthunywa
Izithelo zeganga
BAKITHI silokudla kwemvelo okunengi okutholakala egangeni njalo esakuphiwa nguNkulunkulu. Ukudla lokhu kwakha imizimba yethu, akulasici, kuvikela yonke imikhuhlane esikhala ngayo lamhla. Bantu bakithi sesadela yonke into okhokho abakhula beyidla sisithi yikudla kwabantu abaphansi abangafundanga. Dlana izithelo uphile ugezise lomlomo wakho.
Lapha ngikhuluma ngezithelo zeganga amafruits hatshi ama apple lamabhanana kodwa izithelo zeganga atholakala ngalesi isikhathi. Nanzelela sinini sami ukuthi uyazizuza izithelo lezi engikhuluma ngazo loba uhlala emakhaya kumbe edolobheni ngoba zikhona emakhaya ziyakhiwa egangeni. Emadolobheni ziyathengwa emakethe.
Zithelo bani ongazidla ngalesi isikhathi?
Umnyi
Ukhona emakhaya lemadolobheni. Ulabantwana abangangomcijo womunwe wakho omncinyane. Bavuthwa babe luthanganyana besebekhithikela phansi. Wena dobha ubusuwugezisa. Dlana ngokuhlafuna kancinyane umumuze ukhafule intanga kuphelanje.
Umviyo
Usegangeni emakhaya ulabantwana abangangekhanda lesithupha sakho. Uvuthwa ube yibrownish njalo ube buthakathaka. Ungawuthenga emakethe. Dlana ngokukhukhuza kusale intanga uzikhafule.
Umqokolo
Lawo utholakala egangeni emakhaya lemakethe ungawuthenga nxa usedolobheni. Uvuthwa ubemnyamanyana.
Dlana ukhafule intanga.
Umhagawuwe
Lesisithelo sifunyanwa egangeni, sivuthwa sibemhlophe nke. Sithathe esihlahleni usigezise uzidlele.
Amathunduluka
Avuthwa abebomvu. Wadle ngokuwapuntshuzela emlonyeni uginye amanzi ulahle ikhasi lentanga.
Umlugulu
Isihlahla sakhona silameva abantwana bavuthwa babemnyama. Khana ugezise udle khonalapho.
Umtshwankela
Siyaziwa lesi sithelo njalo siyathandeka. Abantwana bakhona bangangesithupha njalo bavuthwa babemnyama.
Dlana umumuze ukhafule intanga. Lesi sithelo sixubha lamazinyo akho asale esemhlophe nke.
Khululeka udle izithelo zeganga ezakha umzimba ziqede imikhuhlane.
