uMthunywa
Umkami litshapha
KHULU ngiyindoda eleminyaka engu-35 ngithethe umama wabantwabami abane uhlupho yikuthi umama lo litshapha. Nxa evuka ekuseni bayahlala phansi badle babukele umabonakude bengathanyelanga endlini. Khulu umntanethu wakuqala uqede uFomu 4 kodwa laye ingcekeza uyayithanda. Khulu ngingamtshela njani umama lo ngobutshapha bakhe ngoba ngize ngiyangeke nxa ngingavakatshelwa ngabangane bami ngoba siyabe siphakathi kwengcekeza.
Impendulo
Ngiyabonga mzukulu unkosikazi onjalo akasilo tshapha kodwa yisinyefu. Isinyefu siqedwa ngokwethekelela libabili izihlobo ezinhlanzekileyo empilweni lasenhlalweni. Utshele isihlobo sakho esiseduze senze isidlo sedina endlini yesihlobo sonaleso usichasisele ubutshapha benkosikazi yakho njalo umcele enze ngcono ekulihlangabezeni kwakhe. Phambanisi-yani lihambe lendodakazi yakhe kulokho kuvakatsha. Lingaqeda ukudla umama walapha ekhaya ahle aqalise ukugezisa imiganu ngemva kokudla, amcele yena lendodakazi yakhe bazomcedisa ukugezisa imiganu. Ngalesisikhathi begezisa imiganu axoxe kakhulu ngokuhlanzeka lendlela umuzi ophathwa ngayo.
Bonke bobathathu bagezise imiganu bezixoxela ngokwehlukana lengcekeza. Aqhubeke athi umama ekhaya nxa engaphitshekanga ngokuphatha kuhle umuzi wakhe uyangisa indoda yakhe. Labantwana bakhe baphinde bamfuze phose babesebeswela umendo. Akhulume ehlayaza njalo aphinde abameme ukuthi babuye bazokwemethekelela. Phakathi kwakhe lendodakazi yakhe ukhona ozabamba masinyane akwenze lokho obekufundiswa ngumama ikakhulu indodakazi iyabe isilimukele ukuthi ingalahlekelwa ngumendo. Acele laye ukuthi ufuna azobavakatshela ngelinye ilanga.
Mzukwana bevakatsha katshele indoda yakhe ukuthi athenge ukudla okufananayo, umama lo abe esesiba yisethekeli esingehlukani lomkulu abanye kuyabenza bafunde ukuhlukana lendlela ezisemzini yabo. Kubabuhlungu mzukulu ngoba isifungo somtshado wenu asitshongo ukuthi lizakwehlukaniswa yibutshapha kodwa sathi lizakwehlukaniswa yikufa. Zama khonokho.
Ngimtshele yini ukuthi kasimntanakhe
Khulu ngicela ungicebise ngingumama olabantwana ababili kodwa owesibili kayisuye womkami. Ngimtshele njani umkami ukuthi umntwana wesibili kasuye wakhe ngoba ubaba womntwana lo owangimithisayo wathi ngikhiphe isisu lesi. Khulu sekungehlule ukuthi ngiphile lemfihlo le umntwana lo useleminyaka elitshumi njalo ngiyazi ukuthi kuzavela kuphela ngingaze ngikufihle.
Impendulo
Indaba nansi mzukulu akulanto entsha zonke izinto zindala. Kungabanjani ungikhiphe imihlola ngokungitshela ukuthi wena vele uhambisana lendoda le enguyise womntwana. Nxa kungayisikho lokho ginya imfihlo kuzazivelela kodwa, umntwana lo esekhulile ngoba iqiniso lengoma lithi “Noma lingalela ngizamazi ubaba” lomntwana nxa esekhulile uzagila imikhuba yamasiko akibo lanxa eselomuzi wakhe, uzabhoda ebantwini bamtshele ukuthi akazalwa yile indoda yakho njengonina uzabuya akubuze ukuthi kanti yena uzalwa ngubani, ngalesosikhathi ungamfihleli umtshele isibongo kanye legama likayise. Uyabe eselomuzi wakhe esesenza okomuzi wakhe, njalo esezihambela yedwa kuyise. Kuyabe sekungaselahlupho lwakho sekuyindaba yakhe loyise.
Uzazihambela kubaba lo akuye amtshele athi “Baba ngiledlozi lakobani”. Ubaba nxa wayevele efanisa linto imehlula ukuthi ayibhoboze njani, umntwana lo uzafanana labakibo. Akusoze kubelohlupho, ubaba uzathi hamba uyethethela lelodlozi olalo.
Indoda iyadliswa yini?
Khulu ngicela ukubuza ukuthi kuqondile yini ukudlisa indoda ukuthi ikuthande imitshado yemithi iyalasta na?
Impendulo
Mzukulu ubuze kuKhulu umhambi wendlela. Indoda kayidliswa, indoda yamkela isiphatho esihle esivela kunkosikazi wakhe. Nxa ufuna uthando olungapheliyo emzini wakho hlala ugezekile kodwa wenze imisebenzi yangekhaya yonke njalo ucele umkakho ukuthi ucela ukuyafundela ukupheka ubusupheka izinto ezimnandi ezihlanzekileyo, uzabona nxa ekhatshana lawe asoze adle isitshwala senext door, uhlala njalo nje ekhumbula umuzi wakhe. Nansi ingozi ngokudlisa indoda. Indoda nxa uyidlisa wohlukwazi ukuthi uyidlisa amanyala.
Isiphetho sayo izakwehluleka ukuyasebenza itshone ibhoda ngomduli sengathi idliswe ngomsila wompankwa wona ohlala ubhoda ngomduli. Kukhona njalo engingeze ngakutshela khona ephepheni likazulu. Imvubelo yokudlisa indoda iyayangisa ihle imtshiye sengathi uyahlanya abe setshona elandelana lawe njengenja. Phinde futhi kuphele njengempilo yenja yona ehlala iminyaka engu-7 ife. Laye odlisiweyo umxubaniso wothando kuzaphela ngemva kweminyaka engu-7 alandele abanye abayadinga umsebenzi eGoli kanti yena ubalekela wena awuphindi umbone futhi. Impilo yothando lweqiniso yikuhlonipha lokuhlanzeka. Yenza khonokho mzukulu wami.
