uMthunywa
Buhlebenkosi Gaule
KUYABE kungabizwa ozwayo eFilabusi kuviki ezayo lapho okuzabe kuthakazelelwa khona usuku lwamasiko atshiyeneyo aseZimbabwe.
Abenhlanganiso yeNational Arts Council of Zimbabwe babambana labantu besigabeni seFilabusi abakhokhelwa yinduna uMaduna eFilabusi lapha kuzanywa ukuba umcimbi lowo omkhulu wamasiko uphumelele koGodlwayo Cultural Centre eFilabusi kusukela mhlaka 21 Nkwenkwezi kusiya ku 27 Nkwenkwezi lonyaka.
UCathrine Mthombeni oyisikhulumi senhlanganiso yeNACZ uchaze ukuba umcimbi wokuthakazelela amasiko uzabe uhlanganisa abantu belizwe lonke ezabelweni zonke ezilitshumi ngenhloso yokubambanisa abantu.
“Kuviki lamasiko kulapha abantu bemihlobo etshiyeneyo abelizwe leZimbabwe abazabe betshengisela khona indlela zabo ezitshiyeneyo zokuphila lamasiko abo njalo lowomcimbi uzaletha ukubambana phakathi kwabantu abavela endaweni ezitshiyeneyo zelizwe,” kutsho uNksn Mthombeni.
UNkszn Mthombeni uqhubekele phambili wathi bakhangelele ukuthi ngeviki lokuthakazelela amasiko abantu beZimbabwe bakhumbule njalo babukise amasiko abo ngokutshengisela izinto ezitshiyeneyo zabensundu ezitshiyeneyo njalo ezitshengisa ubuntu beZimbabwe. Kukhangelelwe ukuthi amaqembu atshiyeneyo abukise imvunulo yamasiko atshiyeneyo kanye lokudla kwesintu kulumcimbi.
Kubikwa ukuthi kumaqembu azabe ebukisa kule-Amagugu International Heritage Center eyasungulwa nguMnumzana Phathisa Nyathi elenhlonso yokulondoloza amasiko abantu beZimbabwe, njalo kuzabe kuleqembu le Zimbabwe Republic Police iKuyedza Womens Club elizabe libukisa imidlalo lokunye okutshiyeneyo okwesintu.
Emcimbini lo kuzabe kukhangelelwe induna ezitshiyeneyo ezizabe zimenyiwe zivela endaweni ezitshiyeneyo njalo zizabe zihamba lezinye inkokheli zezigaba. Kukhangelelwe njalo ukuthi imbongi zihaye inkondlo.
Kuzimbongi ezaziwayo kukhangelelwe ukuba uAlbert Nyathi lo Lerato Nqindi babekhona labahlabeleli beqembu le Black Umfolosi kanye loJays Marabini.
Abenhlanganiso ye NACZ bathe babone ukuba usuku olulodwa lufitshane kakhulu ukuthakazela usuko lwamasiko ngakho babona kungcono ukuba abantu bathole iviki lonke lokuthakazelela lolusuku.
UNkszn Mthombeni uphethe ngokukhuthaza abantu ukuba baziqhenye ngamasiko abo njalo babuye bezotshengisela amasiko atshiyeneyo ngaleyo viki njalo lowo mcimbi awuhlawulwa.
